ശിവ താണ്ഡവ സ്തോത്രം — വരികൾ

॥ ശിവതാണ്ഡവസ്തോത്രമ് ॥

॥ ശ്രീഗണേശായ നമഃ ॥

ജടാടവീകലജ്ജലപ്രവാഹപാവിതസ്ഥലേ
ഗലേऽവലംബ്യ ലംബിതാം ഭുജങ്ഗതുംഗമാലികാമ് ।
ഡമഡ്ഡമഡ്ഡമഡ്ഡമന്നിനാദവഡ്ഡമര്വയം
ചകാര ചണ്ഡതാണ്ഡവം തനോതു നഃ ശിവഃ ശിവമ് ॥ 1 ॥

ജടാകടാഹസംഭ്രമഭ്രമന്നിലിമ്പനിര്ഝരീ-
വിലോളവീചിവല്ലരീവിരാജമാനമൂര്ധനി ।
ധഗദ്ധഗദ്ധഗജ്ജ്വലല്ലലാടപട്ടപാവകേ
കിശോരചന്ദ്രശേഖരെ രതിഃ പ്രതിക്ഷണം മമ ॥ 2 ॥

ധരാധരേന്ദ്രനന്ദിനീവിലാസബന്ധുബന്ധുര-
സ്ഫുരദ്ദിഗന്തസന്തതിപ്രമോദമാനമാനസേ ।
കൃപാകടാക്ഷധോരണീനിരുദ്ധദുര്ധരാപദി
ക്വചിദ്ദിഗംബരേ മനോ വിനോദമേതു വസ്തുനി ॥ 3 ॥

ജടാഭുജങ്ഗപിങ്ഗലസ്ഫുരത്ഫണാമണിപ്രഭാ-
കദംബകുങ്കുമദ്രവപ്രലിപ്തദിഗ്വധൂമുഖേ ।
മദാന്ധസിന്ധുരസ്ഫുരത്ത്വഗുത്തരീയമേദുരെ
മനോ വിനോദമദ്ഭുതം ബിഭര്തു ഭൂതഭര്തരി ॥ 4 ॥

സഹസ്രലോചനപ്രഭൃത്യശേഷലേഖശേഖര-
പ്രസൂനധൂലിധോരണീവിധൂസരാങ്ഘ്രിപീഠഭൂഃ ।
ഭുജങ്ഗരാജമാലയാ നിബദ്ധജാടജൂടകഃ
ശ്രിയൈ ചിരായ ജായതാം ചകോരബന്ധുശേഖരഃ ॥ 5 ॥

ലലാടചത്വരജ്വലദ്ധനഞ്ജയസ്ഫുലിങ്ഗഭാ-
നിപീതപഞ്ചസായകം നമന്നിലിമ്പനായകമ് ।
സുധാമയൂഖലേഖയാ വിരാജമാനശേഖരം
മഹാകപാലി സമ്പദേ ശിരോ ജടാലമസ്തു നഃ ॥ 6 ॥

കരാലഭാലപട്ടികാധഗദ്ധഗദ്ധഗജ്ജ്വല-
ദ്ധനഞ്ജയാഹൂതീകൃതപ്രചണ്ഡപഞ്ചസായകേ ।
ധരാധരേന്ദ്രനന്ദിനീകുചാഗ്രചിത്രപത്രക-
പ്രകല്പനൈകശില്പിനി ത്രിലോചനേ രതിര്മമ ॥ 7 ॥

നവീനമേഘമണ്ഡലീനിരുദ്ധദുര്ധരസ്ഫുരത്-
കുഹൂനിശീഥിനീതമഃപ്രബന്ധബദ്ധകന്ധരഃ ।
നിലിമ്പനിര്ഝരീധരസ്തനോതു കൃത്തിസിന്ധുരഃ
കലാനിധാനബന്ധുരഃ ശ്രിയം ജഗദ്ധുരന്ധരഃ ॥ 8 ॥

പ്രഫുല്ലനീലപങ്കജപ്രപഞ്ചകാലിമപ്രഭാ-
ऽവലംബികണ്ഠകന്ദലീരുചിപ്രബദ്ധകന്ധരമ് ।
സ്മരച്ഛിദം പുരച്ഛിദം ഭവച്ഛിദം മഖച്ഛിദം
ഗജച്ഛിദാന്ധകച്ഛിദം തമന്തകച്ഛിദം ഭജേ ॥ 9 ॥

അഖര്വസര്വമങ്ഗലാകലാകദംബമഞ്ജരീ-
രസപ്രവാഹമാധുരീവിജൃംഭണാമധുവ്രതമ് ।
സ്മരാന്തകം പുരാന്തകം ഭവാന്തകം മഖാന്തകം
ഗജാന്തകാന്ധകാന്തകം തമന്തകാന്തകം ഭജേ ॥ 10 ॥

ജയത്വദഭ്രവിഭ്രമഭ്രമദ്ഭുജങ്ഗമശ്വസ-
ദ്വിനിര്ഗമത്ക്രമസ്ഫുരത്കരാലഭാലഹവ്യവാട് ।
ധിമിദ്ധിമിദ്ധിമിദ്ധ്വനന്മൃദങ്ഗതുംഗമങ്ഗല-
ധ്വനിക്രമപ്രവര്തിതപ്രചണ്ഡതാണ്ഡവഃ ശിവഃ ॥ 11 ॥

ദൃശദ്വിചിത്രതല്പയോര്ഭുജങ്ഗമൌക്തികസ്രജോര്-
ഗരിഷ്ഠരത്നലോഷ്ഠയോഃ സുഹൃദ്വിപക്ഷപക്ഷയോഃ ।
തൃണാരവിന്ദചക്ഷുഷോഃ പ്രജാമഹീമഹേന്ദ്രയോഃ
സമപ്രവൃത്തികഃ കദാ സദാശിവം ഭജാമ്യഹമ് ॥ 12 ॥

കദാ നിലിമ്പനിര്ഝരീനികുഞ്ജകോട്ടരേ വസന്
വിമുക്തദുര്മതിഃ സദാ ശിരഃസ്ഥമഞ്ജലിം വഹന് ।
വിലോളലോലലോചനോ ലലാമഭാലലഗ്നകഃ
ശിവേതി മന്ത്രമുച്ചരന് കദാ സുഖീ ഭവാമ്യഹമ് ॥ 13 ॥

നിലിമ്പനാഥനാഗരീകദംബമൌലിമല്ലികാ-
നിഗുംഫനിര്ഭരക്ഷരന്മധൂഷ്ണികാമനോഹരഃ ।
തനോതു നോ മനോമുദം വിനോദിനീമഹര്നിശം
പരശ്രിയഃ പരം പദം തദങ്ഗജത്വിഷാം ചയഃ ॥ 14 ॥

പ്രചണ്ഡവാഡവാനലപ്രഭാശുഭപ്രചാരിണീ
മഹാഷ്ടസിദ്ധികാമിനീജനാവഹൂതജല്പനാ ।
വിമുക്തവാമലോചനാവിവാഹകാലികധ്വനിഃ
ശിവേതി മന്ത്രഭൂഷണാ ജഗജ്ജയായ ജായതാമ് ॥ 15 ॥

ഇമം ഹി നിത്യമേവമുക്തമുത്തമോത്തമം സ്തവം
പഠന്സ്മരന്ബ്രുവന്നരോ വിശുദ്ധിമേതിസന്തതമ് ।
ഹരെ ഗുരൌ സുഭക്തിമാശു യാതി നാന്യഥാ ഗതിം
വിമോഹനം ഹി ദേഹിനാം സുശങ്കരസ്യ ചിന്തനമ് ॥ 16 ॥

പൂജാവസാനസമയേ ദശവക്ത്രഗീതം
യഃ ശംഭുപൂജനപരം പഠതി പ്രദോഷേ ।
തസ്യ സ്ഥിരാം രഥഗജേന്ദ്രതുരങ്ഗയുക്താം
ലക്ഷ്മീം സദൈവ സുമുഖീം പ്രദദാതി ശംഭുഃ ॥ 17 ॥

॥ ഇതി ശ്രീരാവണകൃതം ശിവതാണ്ഡവസ്തോത്രം സമ്പൂര്ണമ് ॥