ଶିବ ତାଣ୍ଡବ ସ୍ତୋତ୍ର — ଗୀତ

॥ ଶିବତାଣ୍ଡବସ୍ତୋତ୍ରମ୍ ॥

॥ ଶ୍ରୀଗଣେଶାୟ ନମଃ ॥

ଜଟାଟବୀଗଲଜ୍ଜଲପ୍ରବାହପାବିତସ୍ଥଲେ
ଗଲେଽବଲମ୍ବ୍ୟ ଲମ୍ବିତାଂ ଭୁଜଙ୍ଗତୁଙ୍ଗମାଲିକାମ୍ ।
ଡମଡ୍ଡମଡ୍ଡମଡ୍ଡମନ୍ନିନାଦବଡ୍ଡମର୍ବୟଂ
ଚକାର ଚଣ୍ଡତାଣ୍ଡବଂ ତନୋତୁ ନଃ ଶିବଃ ଶିବମ୍ ॥ ୧ ॥

ଜଟାକଟାହସମ୍ଭ୍ରମଭ୍ରମନ୍ନିଲିମ୍ପନିର୍ଝରୀ-
ବିଲୋଲବୀଚିବଲ୍ଲରୀବିରାଜମାନମୂର୍ଧନି ।
ଧଗଦ୍ଧଗଦ୍ଧଗଜ୍ଜ୍ବଲଲ୍ଲଲାଟପଟ୍ଟପାବକେ
କିଶୋରଚନ୍ଦ୍ରଶେଖରେ ରତିଃ ପ୍ରତିକ୍ଷଣଂ ମମ ॥ ୨ ॥

ଧରାଧରେନ୍ଦ୍ରନନ୍ଦିନୀବିଲାସବନ୍ଧୁବନ୍ଧୁର-
ସ୍ଫୁରଦ୍ଦିଗନ୍ତସନ୍ତତିପ୍ରମୋଦମାନମାନସେ ।
କୃପାକଟାକ୍ଷଧୋରଣୀନିରୁଦ୍ଧଦୁର୍ଧରାପଦି
କ୍ଵଚିଦ୍ଦିଗମ୍ବରେ ମନୋ ବିନୋଦମେତୁ ବସ୍ତୁନି ॥ ୩ ॥

ଜଟାଭୁଜଙ୍ଗପିଙ୍ଗଲସ୍ଫୁରତ୍ଫଣାମଣିପ୍ରଭା-
କଦମ୍ବକୁଙ୍କୁମଦ୍ରବପ୍ରଲିପ୍ତଦିଗ୍ଵଧୂମୁଖେ ।
ମଦାନ୍ଧସିନ୍ଧୁରସ୍ଫୁରତ୍ତ୍ଵଗୁତ୍ତରୀୟମେଦୁରେ
ମନୋ ବିନୋଦମଦ୍ଭୁତଂ ବିଭର୍ତୁ ଭୂତଭର୍ତରି ॥ ୪ ॥

ସହସ୍ରଲୋଚନପ୍ରଭୃତ୍ୟଶେଷଲେଖଶେଖର-
ପ୍ରସୂନଧୂଲିଧୋରଣୀବିଧୂସରାଙ୍ଘ୍ରିପୀଠଭୂଃ ।
ଭୁଜଙ୍ଗରାଜମାଲୟା ନିବଦ୍ଧଜାଟଜୂଟକଃ
ଶ୍ରିୟୈ ଚିରାୟ ଜାୟତାଂ ଚକୋରବନ୍ଧୁଶେଖରଃ ॥ ୫ ॥

ଲଲାଟଚତ୍ଵରଜ୍ଜ୍ଵଲଦ୍ଧନଞ୍ଜୟସ୍ଫୁଲିଙ୍ଗଭା-
ନିପୀତପଞ୍ଚସାୟକଂ ନମନ୍ନିଲିମ୍ପନାୟକମ୍ ।
ସୁଧାମୟୂଖଲେଖୟା ବିରାଜମାନଶେଖରଂ
ମହାକପାଲି ସମ୍ପଦେ ଶିରୋ ଜଟାଲମସ୍ତୁ ନଃ ॥ ୬ ॥

କରାଲଭାଲପଟ୍ଟିକାଧଗଦ୍ଧଗଦ୍ଧଗଜ୍ଜ୍ଵଲ-
ଦ୍ଧନଞ୍ଜୟାହୁତୀକୃତପ୍ରଚଣ୍ଡପଞ୍ଚସାୟକେ ।
ଧରାଧରେନ୍ଦ୍ରନନ୍ଦିନୀକୁଚାଗ୍ରଚିତ୍ରପତ୍ରକ-
ପ୍ରକଳ୍ପନୈକଶିଳ୍ପିନି ତ୍ରିଲୋଚନେ ରତିର୍ମମ ॥ ୭ ॥

ନବୀନମେଘମଣ୍ଡଲୀନିରୁଦ୍ଧଦୁର୍ଧରସ୍ଫୁରତ୍-
କୁହୂନିଶୀଥିନୀତମଃପ୍ରବନ୍ଧବଦ୍ଧକନ୍ଧରଃ ।
ନିଲିମ୍ପନିର୍ଝରୀଧରସ୍ତନୋତୁ କୃତ୍ତିସିନ୍ଧୁରଃ
କଲାନିଧାନବନ୍ଧୁରଃ ଶ୍ରିୟଂ ଜଗଦ୍ଧୁରନ୍ଧରଃ ॥ ୮ ॥

ପ୍ରଫୁଲ୍ଲନୀଲପଙ୍କଜପ୍ରପଞ୍ଚକାଲିମପ୍ରଭା-
ଽବଲମ୍ବିକଣ୍ଠକନ୍ଦଲୀରୁଚିପ୍ରବଦ୍ଧକନ୍ଧରମ୍ ।
ସ୍ମରଚ୍ଛିଦଂ ପୁରଚ୍ଛିଦଂ ଭବଚ୍ଛିଦଂ ମଖଚ୍ଛିଦଂ
ଗଜଚ୍ଛିଦାନ୍ଧକଚ୍ଛିଦଂ ତମନ୍ତକଚ୍ଛିଦଂ ଭଜେ ॥ ୯ ॥

ଅଖର୍ବସର୍ବମଙ୍ଗଲାକଲାକଦମ୍ବମଞ୍ଜରୀ-
ରସପ୍ରବାହମାଧୁରୀବିଜୃମ୍ଭଣାମଧୁବ୍ରତମ୍ ।
ସ୍ମରାନ୍ତକଂ ପୁରାନ୍ତକଂ ଭବାନ୍ତକଂ ମଖାନ୍ତକଂ
ଗଜାନ୍ତକାନ୍ଧକାନ୍ତକଂ ତମନ୍ତକାନ୍ତକଂ ଭଜେ ॥ ୧୦ ॥

ଜୟତ୍ଵଦଭ୍ରବିଭ୍ରମଭ୍ରମଦ୍ଭୁଜଙ୍ଗମଶ୍ଵସ-
ଦ୍ଵିନିର୍ଗମତ୍କ୍ରମସ୍ଫୁରତ୍କରାଲଭାଲହବ୍ୟବାଟ୍ ।
ଧିମିଦ୍ଧିମିଦ୍ଧିମିଦ୍ଧ୍ଵନନ୍ମୃଦଙ୍ଗତୁଙ୍ଗମଙ୍ଗଲ-
ଧ୍ଵନିକ୍ରମପ୍ରବର୍ତିତପ୍ରଚଣ୍ଡତାଣ୍ଡବଃ ଶିବଃ ॥ ୧୧ ॥

ଦୃଷଦ୍ଵିଚିତ୍ରତଳ୍ପୟୋର୍ଭୁଜଙ୍ଗମୌକ୍ତିକସ୍ରଜୋର୍-
ଗରିଷ୍ଠରତ୍ନଲୋଷ୍ଠୟୋଃ ସୁହୃଦ୍ଵିପକ୍ଷପକ୍ଷୟୋଃ ।
ତୃଣାରବିନ୍ଦଚକ୍ଷୁଷୋଃ ପ୍ରଜାମହୀମହେନ୍ଦ୍ରୟୋଃ
ସମପ୍ରବୃତ୍ତିକଃ କଦା ସଦାଶିବଂ ଭଜାମ୍ୟହମ୍ ॥ ୧୨ ॥

କଦା ନିଲିମ୍ପନିର୍ଝରୀନିକୁଞ୍ଜକୋଟରେ ବସନ୍
aବିମୁକ୍ତଦୁର୍ମତିଃ ସଦା ଶିରଃସ୍ଥମଞ୍ଜଲିଂ ବହନ୍ ।
ବିଲୋଲଲୋଲଲୋଚନୋ ଲଲାମଭାଲଲଗ୍ନକଃ
ଶିବେତି ମନ୍ତ୍ରମୁଚ୍ଚରନ୍ କଦା ସୁଖୀ ଭବାମ୍ୟହମ୍ ॥ ୧୩ ॥

ନିଲିମ୍ପନାଥନାଗରୀକଦମ୍ବମୌଲିମଲ୍ଲିକା-
ନିଗୁମ୍ଫନିର୍ଭରକ୍ଷରନ୍ମଧୂଷ୍ଣିକାମନୋହରଃ ।
ତନୋତୁ ନୋ ମନୋମୁଦଂ ବିନୋଦିନୀମହର୍ନିଶଂ
ପରଶ୍ରିୟଃ ପରଂ ପଦଂ ତଦଙ୍ଗଜତ୍ଵିଷାଂ ଚୟଃ ॥ ୧୪ ॥

ପ୍ରଚଣ୍ଡଵାଡବାନଲପ୍ରଭାଶୁଭପ୍ରଚାରିଣୀ
ମହାଷ୍ଟସିଦ୍ଧିକାମିନୀଜନାଵହୂତଜଳ୍ପନା ।
ବିମୁକ୍ତଵାମଲୋଚନାବିବାହକାଲିକଧ୍ଵନିଃ
ଶିବେତି ମନ୍ତ୍ରଭୂଷଣା ଜଗଜ୍ଜୟାୟ ଜାୟତାମ୍ ॥ ୧୫ ॥

ଇମଂ ହି ନିତ୍ୟମେବମୁକ୍ତମୁତ୍ତମୋତ୍ତମଂ ସ୍ତବଂ
ପଠନ୍ସ୍ମରନ୍ବ୍ରୁବନ୍ନରୋ ବିଶୁଦ୍ଧିମେତିସନ୍ତତମ୍ ।
ହରେ ଗୁରୌ ସୁଭକ୍ତିମାଶୁ ୟାତି ନାନ୍ୟଥା ଗତିଂ
ବିମୋହନଂ ହି ଦେହିନାଂ ସୁଶଙ୍କରସ୍ୟ ଚିନ୍ତନମ୍ ॥ ୧୬ ॥

ପୂଜାବସାନସମୟେ ଦଶବକ୍ତ୍ରଗୀତଂ
ୟଃ ଶମ୍ଭୁପୂଜନପରଂ ପଠତି ପ୍ରଦୋଷେ ।
ତସ୍ୟ ସ୍ଥିରାଂ ରଥଗଜେନ୍ଦ୍ରତୁରଙ୍ଗୟୁକ୍ତାଂ
ଲକ୍ଷ୍ମୀଂ ସଦୈବ ସୁମୁଖୀଂ ପ୍ରଦଦାତି ଶମ୍ଭୁଃ ॥ ୧୭ ॥

॥ ଇତି ଶ୍ରୀରାବଣକୃତଂ ଶିବତାଣ୍ଡବସ୍ତୋତ୍ରଂ ସମ୍ପୂର୍ଣମ୍ ॥